تحدي ال٢٩ يوم في أكتساب مهارة جديدة✌🏻

مرحبًا گااااايز..

باليوم الأخير و المدونة الأخيرة من تحدي ال٢٩ يوم ويه مرتضى بتعلم مهارة

جديدة في حياتنا..

تعالوووو أدوخكم وياي إذا ألكم واهس تقرون وذا ما الكم واهس

رح أختصرها عليكم بالصور و الفديو الموجود جوه👇🏻👇🏻.

بدايةً خلي أعرفك بنفسي..

أني سيف العبطان من بغداد أسكن وره الشمس (في قضاء أبو غريب)

خريج بكلوريوس هندسة تقنيات حاسوب دُفعة كورونا الفاتت وعمري ٢٣ سنة مهتم بالأدب أكثر من أي شيء آخر وعندي مشاركات أدبية لا بأس بيها وكذلك عندي مؤلفات رح تتحول إلى ورقية بالمستقبل..

وأهم شغلة هيه كوني تشريني عندي رسالة حب وسلام و وطن رايد أوصلها

لأكثر عدد من الأشخاص و أوعي كثير من الشباب و المراهقين المغلوب على أمرهم ودا اشتغل هذا على الشي من خلال النشر و الوعي الي أتركه بنفوسهم من التقي ويه أشخاص ما أعرفهم بأي مكان خاصة بأماكن التظاهرات و المسيرات الي تصير بين فترة وفترة..

شاركت ويه مرتضى بتحدي تعلم مهارة فن الرسم على الخشب عن طريق الحرق وبالنهاية ضفت الها النحت على الزجاج..

شنو هذا الفن وشنو تفاصيله؟ كملو قراءة المدونه للنهاية وتعرفون كلشي..

شخصيًا تعرفت على هذا الفن بالصدفة عن طريق أحد الاصدقاء

لكن ماجان أكو شي يشغفني بي لأنو جنت مهتم بالكتب أكثر من 

أي شيء ثاني، لكن مع التحدي صار الي واهس وبديت بي 

والحمدلله حصلت على نتائج رائعة..

تحتاج بهذا الفن إلى عدة أدوات وهي..

١-كاوية حارقة للخشب.

٢-خشب أبيض سواء كان جاوي أو معاكس.

٣-ورق تنعيم.

٤-رسمة للشخصية الي تريد ترسمها.

وأني وضحت بفديو سابق طريقة الرسم، وهسه رح اشوفكم صور وقارنو الفرق بين البداية والي وصلت اله..

مثل مادا تشوفون هنا ع اليسرة هيه الرسمات البسيطة الي بديت بيها وع اليمنه هيه الموناليزا بعد فترة من التدريب و الأستمرارية بأتقان هذا الفن..

رح انزللكم صور للأعمال الي اشتغلتها بهذا الفن وكذلك صور 

للرسمات و الكتابات الي اشتغلتها بالنحت على الزجاج والي هوه أصعب بهواي من الحرق لذلك أجلت الشغل عليه إلى حينٍ آخر واستقريت على فن الحرق.

هاي الصورة الأولى بالنحت على الزجاج عن طريق الفرطونة الخاصة بهاي الأمور.

وهنا بفن الحرق..

وذا تشوفون هاي  القطع على شكل دائرة هيه لرسمه مكونه من ١٢ شخصية رح اشتغلها بالمستقبل القريب لكن يحتاجلها وقت..

هاي الرسمة هيه ل١٢ شخصية على شكل ساعة تشتغل فعاليًا وبيهه أميال للتوقيتات..

وهاي الشخصيات همه شهداء ثورة تشرين (ثورة الأحرار) وعلى رأس القائمة هو أيقونة الثورة  صفاء السراي، وهاي القطع من جذوع الشجر رح الزكها على خشبه دائرية جبيره بقطر ١٢٠سم.. هذا ممكن يكون هوه اجمل عمل فني أشتغله لأن محد مسوي قبل خاصة اجتني الفكرة بعد ما اشتغلت رسمة لصفاء السراي وموجودة كدامكم 👇🏻و ان شاء الله اكدر اكمل هذا العمل و عندي اضافات عليه رح أخليها مفاجئة الكم بالمستقبل بعد ما يكمل.

هنا هيه البدايات..

وهنا الأنجازات..

طبعًا وره مانشرت هذا الشغل هواي أشخاص نعجبت بي..

وطلبو مني أرسمهم لكن ماكو فراغ لهذا الشيء، بس ممكن بالمستقبل

أفتح مشروع بسيط لمساعدة المحتاجين عن طريق هذا الفن لكن بعد أتقانه

بشكل نهائي، وان شاء الله اكدر على هذا الشيء..

بنهاية التحدي ممكن ما اكون وصلت للي أريده لكن فعليًا بديت أحقق الي اريده وخاصة انو ضفت هواية جديدة إلى هواية القراءة و الكتابة كونها هي الأصل وكذلك بالمستقبل منكن أتعلم غير فنون بمثل هاي التحديات..

لكن غالبًا رح أتجه لتطوير ذاتي لغويًا و بتعلم مهارات جديدة اكدر أستفاد منها بحياتي المستقبلية.

جان التحدي حلو و الأشخاص الي تعرفت عليهم جداً رائعين، ممكن تكون فرصة السفر ما تتعوض لكن ليست مستحيلة بالمستقبل إذا ما فزت وشخصيًا أعتبر نفسي فائز بتعلم هذا الفن و أتقانه للدرجة الي وصلت ألها حاليًا.

وهذا الفديو الي حجيتلكم عنه بالبداية والي مايضيف هواي على الي حجيته.

هاي آخر مدونة بالتحدي لكن ليست آخر مدونه ألي..

أنتظرو المدونه القادمة بإنجاز أكثر من رائع و إنطلاقة جديدة كذلك.

محبتي الكم..

سيف العبطان       ٢٠٢١/٧/٣